23.08.2010 / 372 marta o`qilgan
Samarqand viloyatining Qo`shrabot tumanidagi uchta avtokorxona tomonidan yo`lovchilarga transport xizmati ko`rsatilayotgan yo`nalishlar soni 15 gata yetdi. Bugun birgina shaharlararo yo`nalishlarda 80 dan ziyod yengil mashina, 30 ga yaqin mittiavtobus va o`nlab avtobuslar qatnovi yo`lga qo`yilgan.
Mustaqillik tufayli yurtimiz dunyodagi avtomobilsozlik sanoati rivojlanayotgan sanoqli mamlakatlar qatoriga qo`shilgani avtotransport sohasidagi muammolarimizni ham o`z ulovlarimiz hisobiga yechish imkonini berdi. Zero, bugun yurtimizning xohlagan burchagida Asaka va Samarqand avtomobil' zavodlarida ishlab chiqarilayotgan zamonaviy yengil mashinalar va avtobuslar yo`lovchilarning uzog`ini yaqin qilmoqda. Jumladan, Qo`shrabotning har bir ko`chasida ham "Lasetti", "Neksiya", "Matiz", "Damas" kabi yengil mashinalarni va Samarqand avtomobil' zavodi avtobuslarini uchratish mumkin. Ayni paytda ular nafaqat tuman ichki yo`nalishlarida, balki, Samarqand, Toshkent shaharlariga va qo`shni viloyatlarga eltuvchi yo`nalishlarda ham qatnab, yo`lovchilarga yuqori sifatli transport xizmati ko`rsatmoqda.
- Qariyb ellik yildan buyon Samarqandga qatnab, bugungidek imkoniyatga ega bo`lmaganmiz, - deydi qo`shrabotlik Boltaboy Mamarasulov. - Toshkent yoki Samarqandga bormoqchi bo`lsak, birinchi bo`lib xayolimizga "avtobusga ulguramanmi, joy bo`ladimi", degan o`y kelardi. Tong yorishmasdan ko`chaga chiqib, o`tgan mashinaga qo`l siltab, ovora bo`lardik. Transport vositalarining eskiligi tufayli Samarqandgacha ikki yarim-uch soat yo`l yurardik, yo`lovchilar uchun yetarli sharoit yo`qligi bois bu har qanday odamning tinkasi qurirdi.
Bugun ahvol umuman boshqacha. Istagan vaqtda yo`lga chiqib, xohlagan manzilga bemalol yetib olish mumkin. Hatto uyda o`tirib ham mashina chaqirsangiz, bir zumda yetib keladi. Zamonaviy avtobuslarimiz ham bir soat o`tar-o`tmay "Qo`shrabot-Samarqand" yo`lini bosib o`tib, manzilimizga eson-omon yetkazmoqda. Bundan tashqari, o`nlab mittiavtobuslar aholi xizmatida.
- Quvkalla qishlog`imizdan Samarqand shahrigacha bo`lgan masofa 130 kilometrdan ziyodroq, - deydi Samarqand davlat universiteti talabasi Jamshid Tuliyev O`zA muxbiriga. - Har kuni Samarqand shahriga avtobus muntazam qatnab turibdi. Yo`l haqi ham ancha arzon. Bu, ayniqsa, biz talabalar uchun juda qulay.
Tuman markazidagi bosh avtobekatda bugungi kunda katta hajmdagi rekonstruksiya ishlari amalga oshirilib, haydovchilar va yo`lovchilar uchun zarur shart-sharoit yaratilmoqda. Xizmat ko`rsatish va servis shaxobchalari bunyod etilmoqda. Bularning barchasi yo`lovchilarga ko`rsatilayotgan xizmat sifatini oshirish barobarida hududlar infratuzilmasini rivojlantirish, qo`shimcha ish o`rinlari yaratish va, eng muhimi, aholi turmush farovonligini yanada yuksaltirishga xizmat qiladi.
